市場熱線：中通服 (552) 今年有運行

Orientaldaily.com 古勝 13.2.2012

電訊設備股一直受惠於網絡升級改造，但舊年跑贏大市之後，今年就跑輸成條街。不過係因股而異，好似京信 (2342) 同星辰 (1155) 業務相近，但走勢差天共地。舊年中興 (763) 威、中通服 (552) 沉，但今年則見逆轉；中通服搞掂咗供股之後，計落估值優勢就變成大落後。

中通服一一年PE唔夠9倍，歷史平均市盈率大約係12倍，息率有4厘幾，計埋佢每年盈利都有雙位數字增長，PEG唔夠1倍。中通服大股東係中電信 (728)，中電信攞「哎瘋4S」傳到行一行，但股價反而要捱沽，皆因手機補貼筆數短期支出大過收入，但要搶高端客戶先要改善網絡質素，中電信同時要搞寬頻到戶兼提高速度，另方面要準備4G戰線，所以中通服未來唔憂生意。

另闢海外新財路

而中通服今次供股主要係話想開拓海外市場，如果能夠搵到另一條財路，就唔使話年年「穩定」增長咁悶。中通服連續7支陽燭，上個禮拜股價卒之突破過去三個幾月嚟喺3.25至3.75元嘅區間上落，氣勢肯定如虹。供股其實係大股東低價增持嘅手法之一，增持完之後經常見由蟲變龍。