中國無線 (2369) 手機N930絕對媲美 iPhone

2010年11月16日 Appledaily.com 李華華

金融大鱷索羅斯嘅基金喺香港嘅辦公室，上個星期一（ 8日）開咗張之後，佢班鱷魚仔（佢啲手下）隨即四出覓食！路邊社消息話， 9日嗰朝，喺大摩嘅安排下， 3個索羅斯基金代表去咗深圳，拜訪中國無線（ 2369）同中興通訊（ 763）。據聞 3隻小鱷同中國無線班管理層傾咗兩粒鐘先走人；睇嚟好快就會見到大鱷親自踩去深圳！咁 2369有咩咁吸引？除咗今年中期業績盈利爆升 7.4倍到 2.72億人仔之外，佢嘅「酷派」手機喺內地 3G市場嘅佔有率亦有成 10.6%，緊次於三星同諾基亞，係內地品牌手機龍頭大哥，呢個月底仲會推出新款高端 Android手機 N930，售價會係 5999人仔……但係華華覺得最吸引嘅其實係集團執董兼財務總監蔣超嘅「武功」！

N930手機　據講保密好掂
蔣超話， N930絕對媲美 iPhone，當中 4大功能甚至可以撼低 iPhone！佢舉例話，當中嘅保密功能就深得中央領導人愛戴，中央保密部門、以至部份省市領導都用呢款新手機；原因係一旦遺失手機，機主報失後，中國無線可以幫佢哋將手機資料備份喺集團儲存庫，然後將手機內資料完全消滅，之後當機主換過部手機，先將資料再重新輸入。仲有，呢款手機可以一次過將短訊發畀成一萬人；配有嘅搜索功能亦方便用戶搵想要嘅通訊資料；又可以為唔同行業用戶提供個性化無線數據上網應用服務……擺埋領導人上枱兼自稱係 iPhone殺手，而且仲要講到咁動聽，大鱷他日落搭入股嘅話，蔣生一定有得加人工同升職呢！