青心直說：永利澳門(1128)水位唔多

青心直說：永利澳門水位唔多

大注孖展博唔過
里昂報告其實唔差, 睇番最近分析濠賭股，顯然都收到風內地放寬居民到澳門的限制，唔怪得 8月開始賭股一飛冲天，連銀河娛樂（ 027）都話，旗下星際酒店上月有九成入住率，黃金周更係爆晒棚。自 5月開始，里昂大力推介賭股，叫買新濠國際（ 200）同信德集團（ 242），近期更力捧正進行推介的永利澳門（ 1128），原因係無論於美國拉斯維加斯，定係同澳門地頭蟲比，賺錢能力都係最高，上半年永利澳門業務 EBITDA超過 8億美元，冠絕同行， 08年純利 20.4億元，澳博只賺唔夠 8億元，雖然市佔率只有 17%，今年頭半年永利已賺咗澳博上年全年條數。雖然基本因素好，但細心睇 PE定得好高，原來分包銷商名單中，幾乎所有投行都係座上客，根本冇留水位，縱使額頭寫住發財埋便，小注怡情還可以，大注孖展就博唔過，隨時有殺冇賠。

胡孟青
.
.