消費股揀 "莎莎 (178)" 達芙妮 (210)

青心直說：發揮師奶股神智慧

Appledaily.com 2010年03月08日

經濟谷底回升，一般人終於感受得到，可能係大家炒樓賺大錢，出街食飯消費都手鬆咗。近日入過旅行社 Book團都知，復活節團費貴得非常誇張，以前三四千銀搞掂嘅，??家雙倍團費都冇位。唔單止外遊消費勁，本地消費者出街都一袋二袋，行吓尖沙嘴廣東道就會見到間間名店排長龍，未知是否暴風雪前的歌舞昇平。人人買、個個買，發揮師奶股神智慧，搵吓有無零售股好買先。數碼通（ 315）推出 iPhone後，股價一直冇運行，但公司就密密回購，單係今年就回購咗 19次，一路從 6.47元買上嚟，到 7.12元都唔手軟繼續吸。雖然公司中期盈利大升 1倍至 1.1億元，但野村睇死佢 EBITDA將受 iPhone拖累，畀減持評級。不過，可能寫報告嘅朋友未係 iPhone用戶，唔知佢嘅威力。筆者已不下一次聽身邊朋友講，終於等到數碼通出 iPhone，自 1月公司力谷以來，地鐵車廂內，一行 6個人，總有 3、 4個手指指用緊 iPhone。

消費股揀莎莎達芙妮
冇錯，賣新手機要補貼，但 iPhone最耐人尋味係，即使免費任上網，用家往往因為發 SMS太過簡單方便，而用凸都唔覺，結果近 400蚊月費變成 600蚊有多。呢個就係 iPhone嘅威力，亦解釋咗點解中國聯通（ 762）總係三大電訊股中最強嘅一隻。

本地消費力一時間釋放，連帶零售股亦可看高一線。講開今日三八婦女節，同頂住半邊天相關嘅女性消費股表現一向唔失禮。莎莎國際（ 178）近日成交增多，今年頭兩個月零售銷售增長 22%。呢隻股可以話係本地零售業寒暑表，老闆郭少明持股逾六成，每次派息都唔會待薄自己，由 04年至今，無論中期定末期息，總會有特別股息醒吓股東。股價累積升好多，但強勢持續，兼勝在冇乜蟹貨。

除咗化妝品，女人鞋股達芙妮（ 210）又再開車，旗下自家品牌頗受內地 OL歡迎。大摩 1月底調高評級至增持睇 7.50元，打個折頭上 7蚊好收手食糊先。

胡孟青
.