M 女俠：茂業國際, 勝利管道

Orientaldaily 15.3.2010

孖妹缸湖遊：魚缸股神齊過招

正所謂「天外有天，人外有人」。大家千祈唔好睇小散戶嘅炒股智商，因為佢哋分分鐘叻過啲「財演」，投資利潤隨時仲多過醫生同律師嘅收入。孖妹經過四出偵查，發掘到3位「魚缸股神」，佢哋係英皇證券行嘅3名散戶──「3M先生」、「神奇女俠」及「一流分析員」，等佢哋同各位分享吓投資秘技，同埋講吓點樣喺風高浪急嘅股市中賺大錢。
3M︰3M先生　女俠：神奇女俠　一流：一流分析員

證券行簡直係臥虎藏龍嘅地方，孖妹成日周圍落行，當然知道散戶炒股有幾掂。不過「人怕出名，豬怕肥」，今次呢3位散戶股神亦唔想露真身，費事畀人話博上鏡啦！孖妹亦好貼心咁，用盡美色氹到美術哥哥，幫佢哋設計咗個卡通造型，相似度高達99.9%。唔講廢話嘞，即刻睇吓訪問啦。

3M先生：「3 MON」睇價攻中型股
莉莉︰你點解要開動3部電腦睇市？（3M先生每次落行都會開晒3個電腦MON，方便睇價）

3M︰一部係落盤用，另外兩部用嚟睇心水股，通常將電腦介面一開四，一次過可以睇4隻股票，而我每日會準備約20隻想入市嘅股仔，兩部電腦就可以睇得多啲。其實我一日要管理3個戶口，會幫太太同個女「炒埋」。

高妹︰近期大市牛皮，炒股有冇斬獲？

3M︰我專買中型股，組合內每日平均都有5至6隻股票，大市牛皮最好，呢類股票先會郁。有時收完風之後，唔會盲目跟隨入市，要睇埋公司業績及基本因素，先會夠膽追入，但一定要睇圖，唔好高追，直到股價破頂先買入，每次短期升浪都會有「三棍」，一旦出現成支大陰燭就即走人，徹底做到我嘅宗旨「低揸高沽」。

高妹：本月你有乜嘢心水「冧巴」？

3M︰三月初我留意理文造紙（02314）及玖紙（02689），一般即日鮮賺5%至10%就走人，中線就會賺20%；依家睇好茂業國際（00848）及勝利管道（01080）。

莉莉︰有冇試過畀大戶跣過？

3M︰大戶唔會呃錢，佢哋都係跟住圖表做嘢，我由八○年開始投資，從來冇上過投資班，全憑經驗炒股，每晚會持之以恒用兩個鐘頭聽專家分析。我好少分析恒指，只會睇期指，玩細期主要睇日線圖及一分鐘圖，依家期指仍處於升勢，一掂到保力加通道中軸就應該買入，估計期指短期阻力位見21,500至21,600點，升到約21,900點嘅支持位就沽出。

神奇女俠：吼熱炒板塊選優質股
高妹：我知道你曾經炒內銀股及滙控（00005）窩輪勁賺200幾萬，不如你細細聲話我知，你去年賺咗幾多呀？

女俠：我由○五年開始一直贏錢贏到○七年，計計埋埋都賺咗過千萬。不過，○八年我就輸番好多，所以拉勻計數，○九年賺咗700萬左右。

莉莉：嘩，好勁呀！我估你一定好少輸錢啦？

女俠：你搵到一個方法贏錢，就自然有其他方法令你輸錢。好似我曾經聽朋友畀嘅貼士，買咗隻位元堂（00897），結果輸咗幾十萬元。但我喺呢件事中亦得到一個教訓，就係以後唔再買消息股 (= don't buy) 。

高妹：不過你始終都係贏錢多過輸錢嘛！你炒股咁勁，有乜嘢投資心得可以醒畀啲成日輸錢嘅散戶呢？

女俠：啲散戶成日輸錢嘅咩？我覺得佢哋炒股好叻㗎！大家一定要留意資金流向，因為股價係死嘅，只要股市及股票有資金推動，恒指與股價自然會上升。簡單啲講，即係只要你觀察到資金流向乜嘢板塊，然後再從該類板塊中尋找優質股票，你就可以賺錢。

莉莉：現時市況牛皮，一時升一時跌，根本估唔到恒指嘅方向，不如你教吓我同高妹點做啦。

女俠：現階段我會用2,000點做一個分界線，即係恒指跌2,000點時，點都去買啲貨擺，咁當然揀啲落後股啦！當恒指升2,000點時你就沽貨，咁點都會有些少利潤嘅。另外，你都要做功課，例如留意外幣升跌、美匯指數、政治及財經新聞等。

一流分析員：睇大行掛盤「等、準、狠」
高妹：大家成日都話要「低買高沽」，講就易，做就難。其實我哋點樣先知幾時要入貨同出貨呢？

一流：好多時大市升緊，但股價會跌，係因為有大戶托住期指升勢去沽貨。所以我認為大家除咗睇圖表、成交量之外，仲要留意投行嘅買賣「盤路」先得，當大行掛出買盤時，代表你都要買貨，如果佢哋不斷掛出賣盤，咁你就要醒水沽貨走人喇 ? ? ?。

莉莉：你又有乜嘢投資心得呢？

一流：止蝕好重要，我明白十個散戶之中，有九個半都係做唔到，但你要記住，唔肯做止蝕就只會愈陷愈深，最終輸得一敗塗地。任何投資都一定要「等、準、狠」，意思係話你千祈唔好心急入市，要有冷靜嘅心去等待最好嘅入市時間，然後就要對準目標股票，大手咁將佢買入；投資不能太過貪心，但市況明顯做好時，就一定要順勢而上，賺到盡。

高妹：最後我想八卦問吓，你每日咁炒股票及細期，一日可賺到幾多錢？

一流：其實投資除咗要賺錢，都係想考吓自己嘅眼光。依家我每日至少都會賺到5,000蚊，有時真係好過打份工。不過冇人永遠都係贏家，所以我投資10次，有7次贏3次輸已經好滿意。

24%散戶出招抽新股
市場上有多隻新股陸續於本月招股，「打頭炮」嘅有匯銀家電（01280），然後就有飛克國際（01998）等，唔知各位股友會唔會認購呢？據今期《東方產經》網上民調，截至上周末晚上6時，話會認購嘅有24.1%，話唔會嘅有54.6%，而話「考慮中」嘅就有21.3%。

3M先生Profile
投資年資：30年

投資專長：細期、中型股（以國企股居多）

投資特色：炒股時有3部電腦跟身，緊貼任何金融市場消息

一流分析員Profile
投資年資：10多年

投資專長：股票、細期

投資金句：投資一定要「等、準、狠」

神奇女俠Profile
投資年資：10多年

投資專長：股票、外幣

投資威水史：07年單靠炒內銀股及滙控窩輪勁賺200多萬元

(高妹) (莉莉) 15.3.2010


.