青心直說：內房樓市 : 溫水煮蛙與凍水煮蟹

胡孟青 Appledaily.com 2010年09月28日
青心直說：溫水煮蛙與凍水煮蟹


美國康奈爾大學做過一個有名的實驗，實驗人員把一隻青蛙丟進放滿冷水大鍋裏，並在鍋底偷偷地加熱，青蛙起初不以為意，但當牠意識到危險時，卻已全身無力，欲躍不能，終於葬身鍋底。近年不斷唱淡內地樓市的前大摩董事總經理及首席分析師的經濟評論員謝國忠，就用凍水煮蟹形容現時中國內地房產市場所處階段。他指雖然眼前仍未見危險，但隨煲內溫度上升，危險程度將增加，然而當開發商及投資者開始意識到危險經已在前面時，他們應該已無力做出任何反應。

內房樓市醞釀危機
正如開始煮大閘蟹時，隻蟹會以為被放回平時嘅湖底，對危險嘅警惕鬆懈，然而水溫上升，大閘蟹已被上升嘅水溫溫到暈陀陀，即使在熱鍋內用力掙扎，都無力再撐，到一切歸於平靜，大閘蟹已被煮熟。謝國忠認為中國房地產市場已見頂，更預期內地房市將進入長達 5年的熊市，尤其人民幣升勢將於 2012年逆轉，資金更將會隨之流走，炒得火熱嘅浙江省，房價更會下跌 8成。

佢話中國房地產開發商與投資者正如同被放在冷水裏的大閘蟹，不知危機逐漸升溫。咁跌到邊個位先至叫做底？根據佢嘅睇法，租金回報要由家唔夠 3%升至起碼 5%或以上，每平方米樓價回落至兩個月平均薪金水平。

佢仲叫大家留意另一指標，是名貴轎車嘅銷路是否出現倒退，流動性收縮當然就是樓市首當其衝嘅元凶。

當泡沫唔可以再用常理與人性去分析時，惟有用 Animal Spirits獸性去解釋人類行為，當人性被貶低至動物水平和層次，是何等悲哀！不過唔使驚，佢嘅文章為有錢無處放嘅人提供資金出路，佢話過去 10年樓市旺消費弱，未來 10年樓市弱消費卻旺，這點我不敢苟同，無咗層樓嘅升值效應，又邊度有心情消費？呢點香港唔少人都係過來人啦。
.
.
.
中環在線：謝國忠溫水煮蟹喻內房

Appledaily.com Li Wa Wa 2010年10月04日

秋風起，蟹膏肥！「空軍司令」謝國忠不愧為「為食」上海人，近日金口又開，話中國樓市調控嘅情況就好似溫水煮蟹。佢解釋說，政府繼續限制信貸、國外熱錢慢慢撤出，令到樓市泡沫慢慢咁洩氣，大城市嘅樓價將會跌一半，泡沫最大嘅浙江省，地價仲會跌夠八成！而嗰啲炒起樓價嘅投機者，就好似啱啱入凍水鍋嘅大閘蟹，家都未識死，殊不知早就被大廚冚蓋開火，等緊水滾。
不過，呢班樓市大閘蟹幾時熟，就要睇吓大廚火力夠唔夠猛。中央向來唔識「煮蟹」，過往多次調控，都係中途熄火離場，令一眾樓蟹有機會逃出生天，再去其他地方繼續吐泡沫。今次謝兄信心十足，已經預備好晒啲薑醋等美食，唔知係咪真係可以如願以償？