胡孟青叫大家唔好供滙豐控股; 2010主題，新能源、核電

胡孟青 31.12.2009

青心直說：展望 2010最緊要保本

嚟到今年最後一個交易日，係時候做總結。經歷金融海嘯，身家縮水後再膨脹，「睇淡唔做淡」嘅講法一度被人話睇錯唔認錯，錯失入市良機，或間歇性拋空機會，但若然真係沽空，見四周盡是壞消息，股市卻不跌反升，可能越沽越凶，小則被挾到手痛，大則輸到傾家蕩產。唔做淡救番一命，但睇淡大市確係錯失咗撈底良機，特別係話我叫大家唔好供滙豐控股（ 005），股價見底 33蚊後升近兩倍。睇淡大市唔代表唔投資炒股，識得揀同國策息息相關股份，回報肯定較供滙控同買盈富基金（ 2800）好得多。講緊係年頭推介嘅海爾電器（ 1169），今年升近 4倍有多，雖然冇比亞迪（ 1211）咁誇張，但夠令你將唔供滙控嘅資金翻幾番，而且速度快過坐滙控 N倍。

一場金融基因突變，改變整個投資市場生態，加上資金氾濫，無論大戶定小投資者都變成驚弓之鳥，但又怕啲錢貶值，惟有投資變投機化身快閃黨。本來貼市係好事，但人人都咁貼市，稍有疑似大煲粥就人踩人，最佳例子係杜拜危機，單消息朝早已出，投資情緒到下午至逆轉，全球大跌市就係咁由香港展開。

換馬中低風險股
展望明年會極具挑戰性，資產泡沫人人都知，喺咁有預期下爆破就唔多似，而一直恐慌多時嘅超級通脹會否真正來臨、美國聯儲局會否大幅加息去應付、美元到底係反彈定轉勢、中國因素嘅火車頭動力有冇衰竭、突發事件如疫症甚或恐怖襲擊會否捲土重來，種種因素都要提防。變數多多，資金少少，已有唔錯回報嘅投資者最緊要保本，不妨將較多資金先行換馬至中低風險股票，例如大大隻嘅金融、基建、食品、交通運輸（航空航運股除外）、電力等，到 1月市況較明朗至大舉出動再博過。以上呢啲股份共通點係提供強大現金流，防守性強。就以股神用畢生最大賭注，入股現金牛火車 Burlington為例，都係睇當地經濟整體好轉，人流物流加快。當然唔少得係國策扶持股，家有家電、汽車，但唔多似係明年主題，新能源、核電好可能會接力。

.