絲絲講場：索羅斯攻A股露手影？

Orientaldaily.com 1.5.2010

自從「國際資本大鱷」索羅斯話佢嘅基金公司喺香港設點，市場一直關注佢嘅動向，日前深圳發展銀行發表咗一份首季報告，當中提到該行曾接待一個名為「索羅斯基金」嘅調研團隊，談論內容主要係深發展嘅營運情況及發展策略。絲絲未知呢個基金係咪真命天子，但消息即時引起市場人士猜測基金此行嘅動機。

同名基金調研深發展
其實索羅斯已唔係第一次投資A股市場，喺九五年佢曾經斥資2,500萬美元入股海南航空，但由於唔可以直接投資A股，於是轉做戰略投資者。近期佢對A股重燃興趣，雖然喺香港設點，但醉翁之意係內地，只不過佢貪香港冇匯管，要走資都容易啲。

「私募教父」傳回歸A股
咁啱得咁蹺，平保購併深發展嘅交易已經到尾聲，莫非索羅斯真正有興趣嘅係平保A股？不過今次呢隻「索羅斯基金」係咪等於索羅斯旗下嘅「量子基金」，仍然係一個問號，大家惟有拭目以待！

另一邊廂，又有傳「私募教父」趙丹陽最近都可能會回歸A股市場，若然屬實，就係佢自○八年陽光私募產品清盤後再次踏上「熟悉嘅舞台」。照咁睇，A股市場可能又再次風起雲湧。

余絲韻