深圳發展商佳兆業（1638）收購爛尾樓起家

絲絲講場：佳兆業都有郭氏三兄弟

Orientaldaily 21.11.2009

深圳發展商佳兆業（1638）上市搞到如火如荼，聽講仲獲得「彤叔」鄭裕彤青睞，不過呢間公司對香港人嚟講始終比較陌生。絲絲尋日同朋友傾開，先知呢間公司係由三兄弟創立，分別係大佬郭俊偉、二佬郭英成及三弟郭英智，同新地（16）一樣係「郭氏三兄弟」，但呢三兄弟就以搞爛尾樓起家。

收購爛尾樓起家
聽絲絲個朋友講，「深圳版」郭氏三兄弟喺10年前成立佳兆業集團，跟住開始收購珠三角一帶包括深圳、廣州嘅爛尾樓，貪其成本平，執番靚層樓之後就賣出去，其中廣州中石化大廈、深圳桂芳園都係早期嘅代表作。

隨住生意愈做愈大，佳兆業開始自己買地起樓，業務範圍亦由珠三角擴展到長三角及華東地區，依家仲嚟香港上市添，3位郭生今年都只係40幾歲，未來仲有大把發展空間。絲絲醒起，合景泰富（1813）都係由三兄弟創辦，果真係「兄弟同心，其利斷金」呀！

余絲韻

.