內銀股縱需收緊資本充足要求 增資亦好事

青心直說：大陸消息要打八折

Appledaily 2009年11月26日

日前反彈日，大市 66%升幅來自中資金融股，市場以為調整完成奮力追入，結果收市後外電一個消息，話中銀監會收緊國有銀行資本充足要求，雖然銀監即時澄清冇咁嘅事，但喺內地基金經理同股民眼中係「無私顯見私」，總之水洗都唔清。咁污糟，先幫 B股洗白白，再隔空洗埋香港內銀 H股，真係成也內銀、敗也內銀。要配合呢個全城清潔大行動，點少得大行份。高盛話資就集梗，但惟獨工商銀行（ 1398）唔使，假設大銀行資金要求提升到 11%、小型銀行 10%，整體都只需集資 280億人民幣（下同），絕對冇內地傳媒講幾千億咁誇。即使最差情況嘅 13%（銀監早已否認），扣除滙金大股東持股，中國銀行（ 3988）、建設銀行（ 939）、交通銀行（ 3328）喺兩地每間都只係集資二百幾億元，即使配股都大把人爭住接。里昂話要集資成 420億美元，即係 3000億元，仲話可能會減派息。瑞銀就叫大家唔好驚，要集都只係二千幾億元，幾大銀行實力夠，冇事。

內銀股縱需增資亦好事
的確，資本充足水平未夠穩陣係內銀，特別係中小型銀行通病。截至第 3季，招商銀行（ 3968）、浦發及深圳發展銀行核心資本充足率係 6.61%、 6.76%同 5.2%，唔符合監管要求的 7%，所以先有深發展向平安保險（ 2318）定向增發籌過百億元、招行供股、民生銀行（ 1988）來港上市。投資者應正面去睇，融資補充資本水平有助提升銀行體系穩定性同資本質素，滙控（ 005）當日供股咪又係咁。

再者，到時集資規模係咪市傳咁大、係咪一定問股東攞等問題，唔好信晒坊間報道，特別係內地傳媒。有冇留意內地報道往往只係將消息人士輕輕帶過，單係近期中央經濟會議嘅會期就一改再改， Day 1話提早到 11月， Day 2又話要延遲，咁重要嘅會議點會朝令夕改？睇怕係內地市場有太多有心人，不時借傳媒發功，而傳媒又把關不力甚或有利益衝突，加上內地最興 Copy& Paste，一段稿隨時出現喺幾個網頁，但當中又抄啲唔抄啲，所以睇消息又好，聽分析都好，最好打個八折，加入自己思考，即使睇錯市都心甘命抵。

胡孟青
.