青心直說：承達小裝修大生意, P/E 將低於 4倍

青心直說：承達小裝修大生意

Appledaily.com 2010年07月02日 胡孟青

世界各地具象徵意義嘅地標建築，遠睇外觀設計誇啦啦，內部裝潢亦令人留下深刻印象，才可以成為話題之作。近年本港豪宅屋苑都以大型會所作賣點，益顯發展商對設計的重視。然而單係設計絕不足夠，裝修用料亦好重要。平時講嘅「裝修」已不足以涵蓋以上嘅要求，用「裝潢」兩個字應該更恰當。唔好睇小裝修呢門生意，大型裝修工程單單都過千萬甚至過億元，例如香港就有大家熟悉嘅貝沙灣、君頤峰、銀海天峰等大型豪宅大堂及會所，重有半島酒店、港島東一號，而澳門有永利酒店、美高梅金殿、威尼斯人、新葡京等項目嘅超豪靚裝修，都好出色，佢哋嘅內櫳裝潢，均出自同一公司承達國際（ 2288）之手。承達已衝出港澳，進軍內地，並以合營方式，拓展至中東卡塔爾及阿布扎比。

PE將低於 4倍
點解一間裝修公司可以有資格承接大型工程，而且多家藍籌大型發展商都與之合作無間？原因係承達與建築公司及物料供應商以聯盟方式緊密連繫，令後期工作嘅內部裝修工程得以準時交足貨。公司從工業安全、手工質素與準時交貨方面贏盡口碑，擁有口碑就等於擁有市場。另外，公司剛以 3.15億元購入觀塘海濱道億利達工業大廈全幢，配合政府活化工廈的理念，預期翻新工廈將可以成為另一盈利增長點。公司過去 3年之年複合增長達 26.1%，截至 09年 9月底止中期業績，收入增長 1倍至 12.12億元，純利由 6100萬元倍增至 1.2億元，毛利亦由 15%上升至 16%，雖然公司自去年 8月掛牌以來股價表現差強人意，然而估值與業績才是股價最終的依靠 ??? 預期下周五公佈之全年業績將有驚喜， PE將低於 4倍，承達肯定是滄海遺珠。