IPO《胡孟青》首日炒 "新股" 祕訣

09/11/2009 11:3
《青姐手記－胡孟青》首日炒新股祕訣

　　《青姐手記》市況無常，日升日跌，缸邊炒家竟然話完全無難度，差不多係合埋眼睛低位造好坐過夜，高位造淡博低開，如斯簡單唔通散戶都賺大錢？散戶當然無咁好彩，見升跟升買牛，見跌跟沽買熊，結果又係開圍骰，邊個坐過夜的就收回邊個，最後當然係無仇報。　　　　　　　　　　　　　　　　　

＊散戶不走不罷休＊　　
指數唔好炒，市場錢多總要搵嘢炒，新股首日就成了短炒天堂。綜合上周幾隻新股首日表現，炒友莊家都實在非常進取，了解箇中部署，至少可以減少坐艇機會。先講下爆冷新股王利邦（００８９１），首日一開市就Ｍａｒｋ到上三蚊，當時呢口價有成超過３０００萬成交，升幅超過八成，完成反映到佢超額認購５６倍，每９手先分到１手的渴市程度，於是喺頭十五分鐘後即使有回吐，仍係夾返上嚟，跟手仲要再升到３﹒２１元，足足升一倍咁上下，成為今年新股王。　　

很可惜事與願違，當散戶迷失理智以為長升長有，音樂椅已告完結，股價被狂質，三個黑武士出場後，再整多支破低大陰燭你歎下，總之係唔將散仔震走絕唔罷休，理得你Ｔ＋２係咪要平倉，總之「有殺錯無放過」。如斯手法亦出現於有六大金剛大孖沙護法的恆大地產（０３３３３），單睇日線圖首日支陽燭高低波幅近一蚊已夠誇張，睇埋當日部署散戶更要識走位，招股價３﹒５元，開市都係造四蚊咁上下，即係約１４％升幅，相當克制，唔多似有本地同國際分別有４６倍同１１倍超額，因為若然反應咁熱烈，應有唔少基金要追貨。　　

結果跟住發展可以話係利邦倒轉做的翻版，三點過後跌落３﹒８１元，極有機會破發，點知當大飛孖展友準備收市前減磅之際，港交所（００３８８）交易大堂的出市代表嘩聲四起，場內頓時變了「金融大球場」，幾乎全體為３３３３搖旗吶喊，部分仲企埋起身好似入咗馬場咁，皆因股價在收市前廿分鐘內急升兩成有多，喺最後五分鐘更見４﹒８元，散戶又好、大炒家又好都手忙腳亂，紛紛追入，最後十分鐘成交有超過３億股，係全日的２５％。　　　　　　　　　　　　　　　　　

＊未上貨源已歸邊＊　　
而剛於上周五上市的格菱（０１３１８），玩法又係高開低走，高位接貨又係「水瓜打狗」，唔見２２％。所以散戶千祈要小心，首日上市波幅可以好大，而頭１５分鐘亦係最高危時間，往往造就有大成交配合且破頂的買入訊號，稍為定力不足，往往有機會坐艇，而且一旦弱勢已成，通常要跌足一排，睇隻金隅（０２００９）要跌足三個月先收齊，恆盛（００８４５）仍係破發就知。部分快乾啲嘅，好似神冠（００８２９）與同日登場嘅鐵鈦（００８９３）、盈德（０２１６８）與澳優（０１７１７），回幾日就肯升，可知未上市貨源其實已係好歸邊。　　

嚟緊好戲在後頭仲有中糧包裝（００９０６），超額３００倍，仲有高精密（００５９１），大家切記戒急用忍，短炒者則首日見好即收莫貪心，待槍林彈雨後才出去執番。

《獨立股評人　胡孟青》
.