全中國最大條腸衣神冠控股（ 829），以上限定價仍爆升， O嘴程度同諾貝爾獎得主爆冷無異，都教人摸不着頭腦，但背後意義卻值得同大家分析。神冠原來係首間在港上市嘅廣西食品公司，上市儀式冇大孖沙撐場，但就有好多廣西食品廠老闆，甚至女企業家協會嘅 LV手袋黨南下學習。線人現場所見，包括雙滙、廣州食品、金嗓子等都有代表捧場。呢個上市旅行團由商務部高級官員帶隊，可見神冠後台有幾強勁。團員咁星光熠熠，個個都有同一個夢想，希望一登港股門，身家升值十倍，變身人上人，到時錢多到使唔晒，買豪宅當買手袋，樓市點會唔長升長有。喺投資銀行眼中，呢啲民企老闆有如一條條活生生四圍走嘅金條，保薦人好好服侍，特別呢次同聲同氣的招商證券，總動員舉腳支持，有問必答。
等炒高再慢慢派
近期上市新股，能夠力保不失招股價而又有唔錯表現，都係放得入口嘅股份，澳優乳業（ 1717）首日升 28%，至今表現仍然硬淨；令人擔心定價貴嘅國藥控股（ 1099）都連續兩日創新高；加埋首日最多升 53%爆晒腸嘅神冠，盛傳有大型 QDII基金包括華夏、交銀施羅德，同埋區內基金惠理、 Mirae Asset等入飛，市場口味的改變並不難捉摸。不過，新股浪潮時好時壞，十足十變型金剛，呢次唔同嘅係大戶既唔係「博派」，又唔係「狂派」，大飛入咗仍未有大舉派貨，而係成了變種機械人「等派」──等股價再炒高先慢慢派。今年仲有兩個月衝刺期， 20隻股份排緊隊上市，最大幾隻係上親都有丁蟹效應的恒大地產（ 3333）、萬眾期待的民生銀行，仲有中外合資的俄羅斯聯合鋁業，全部都唔放得落口，但勝在夠大，都值得抽。無耐性等嘅投資者，大可留意今日上市嘅寶龍地產（ 1238），減價四成四後暗盤收市升都唔夠一成，可能同知名度較低有關。此欄早前已分析過佢，質優地靚，只要你相信二三線城市將接力撐經濟，就應對佢首日表現望多兩眼。
14.10.2009 胡孟青
沒有留言:
張貼留言