青心直說：紡織股只選申洲

青心直說：紡織股只選申洲

睇報紙雜誌甚至電視節目，經常見到內地人瘋狂買名牌，男人買車買錶、女人買衫買手袋，全球名牌都蜂擁入內地掘金。

令人黯然神傷嘅係日本國寶級時裝設計師山本耀司，始終敵不過經濟低潮，申請破產隨時關門大吉。 Yohji出名貴係人都知，即使佢加進較平的副線品牌，甚至同 Adidas玩 Crossover變種 Y-3，都唔能夠令業務起死回生。

同樣係窮則變，變則通，另一位設計大師 Jil Sander就係成功例子。話說當佢喺 99年被 Prada食咗後離開，最近再次回歸時裝界，落戶日本 Fast Fashion品牌 UNIQLO。以佢一向簡約高貴嘅設計，點都諗唔到會拍埋呢間日版 H&M，唔通有咗 Jil， UNIQLO會變 Prada咩！結果我跌晒眼鏡，最近有友人東瀛遊，原本極睇唔起呢個品牌，點知都一袋二袋行出嚟。

同一系列最近登陸香江，以 Jil十分一價錢成功擄獲潮人歡心，瞬即賣個滿堂紅冇晒貨。名牌單靠內地人消費撐唔耐，快餐式扮名牌嘅時裝已成大勢所趨，價錢平之餘亦要有唔錯嘅質量咁就最煞食。

大客射住　貨源歸邊
論全中國最靚嘅紡織廠，首選肯定係浙江一帶，全球所有大型名牌都集中喺當地生產， UNIQLO基地亦喺嗰度，由申洲國際（ 2313）負責生產，佢嘅出口銷售額繼續穩居全國第一，亦係目前對日本最大嘅紡織出口公司。

申洲平時冇乜人提，原來近日已靜悄悄創新高，股價自 2月低位個零銀錢慢慢升，即使大市回吐佢亦冇驚過，從來冇觸及 50日線，走勢真係用手畫都冇咁靚，每逢回到 10日、 20日線買都冇死。

一大原因係條街冇貨，主席揸住 71%、惠理基金又揸 6%，條街得兩億幾股流通，唔歸邊就勢係假。加上上半年盈利勁升 1.2倍，毛利率升至近 32%，基本因素靚靚。記得 05年上市時，市場認為佢過份依賴 UNIQLO一個大客風險大，反應唔算勁。但原來依賴冇壞，只要呢個客得，申洲都已經好得，仲有 Puma、 Nike、 Adidas等大客，要買強勢紡織股，申洲一個選擇就夠。

胡孟青 Apple 15.10.2009

.