青心直說：三網融合,賺錢係網絡基建鋪設同手機生產商:中興通訊

青心直說：三網融合騰訊玩完？

Appledaily.com 胡孟青 2010年06月11日

三網融合正式落實，廣電局喺呢場宮廷鬥爭中勝出，取得收費電視 IPTV最終集成播控權，下月試點推出。騰訊控股（ 700）突然被洗倉，有傳係分析員收到風話公司調低盈利預測，借三網融合做沽貨嘅掩眼法。所謂三網，係指電訊（電話）、電腦（互聯網）同電視三大網絡通過技術改造，將媒體內容互相滲透交叉，實現網絡資源共享，減低重複建設，最終令電訊服務更普及，收費更大眾化。其實即係一個超大型嘅電訊行業整合。有市場聲音指，基金寧願沽騰訊，買中國移動（ 941），認為中移至係三網合一嘅大贏家。到底對電訊商係咪真係商機處處？以香港為例，自 90年代開放本地電訊市場，三網喺商業競爭下開始自動融合，但發展多年電訊商生意依然難做。支持嘅人就話三網合一後，以中國超過 3.8億網民，每人多花一蚊電訊商都賺死。實情又係咪咁？

手機同網絡商最賺
Google前大中華區總裁李開復總結出幾個有中國特色嘅大趨勢，話 Android手機今年會降價至 1500元（人民幣．下同），明年再跌價至 750元，價格優勢足以令智能手機迅速普及，由於 3G上網費相對較高，開發軟件時必需以較細嘅頻寬用量為原則，預計初期只有免費手機軟件至能突圍而出。智能手機要賣平到 1000元以下，意味手機補貼將繼續蠶食電訊商利潤。

不明朗因素太多，肯定賺錢嘅係負責網絡基建鋪設同手機生產商。中移動第 4期 TD網絡建設正在招標，單係機站建設已超過 10萬個，差不多係前 3期總和。家下呼聲最高係中興通訊（ 763）。到底融合後，網民每日到 QQ嘅習慣係咪咁易一時三刻就改變？答案應該係會多咗人用手機上網玩網遊。

既然三網融合咁巴閉，冇理由聯想集團（ 992）嘅手機唔賣得，電腦銷量更應有增長。大戶要股價調整總要有藉口，睇好中長線表現嘅投資者咪被嚇窒，洗乾洗淨後又會有報告唱好令股價翻身，究竟係大戶沽貨在先，抑或係大行出報告唱衰在先，「傳聞」一隻二隻都係分析員見過管理層獲披露不利股價嘅經營表現預期訊息後，股價就相應輪流插水，可唔可以將股價敏感消息發通告公告天下，唔使投資者死得不明不白!
.