青心直說：總統連任魔咒測市底,

Appledaily.com 2010年06月23日 胡孟青

中國救世界，單靠人民幣升值一招足以令環球股市重振雄風，只係藥效可維持幾耐唔易掌握。有行家話，官方唔希望媒體太高調處理人民幣議題，擔心炒風一發不可收拾。早前美國財長蓋特納訪京前，扮老友推遲唔將中國定為滙率操縱國，之後突然變臉，聯同聯儲局主席伯南克發表強硬言論，指中國低估滙率令全球經濟失衡，議員更指人民幣最少被低估 40%。中方今次高調還擊，暫時應可紓緩美方壓力，而 11月美國中期選舉前，美國政客絕對有誘因砌低美元滙價，藉以刺激出口，粉飾太平。一直唱淡美債的格羅斯亦轉軚睇好，開始趁歐債危機期間增持美債。如果佢冇睇錯市，即美滙指數有機會已於 6月見頂並進一步走弱，將繼續利好港股。

任期首兩年跌市多
唔少人忽略咗滙市對股市嘅指標作用，太集中睇眼前股價表現，死硬派一直隨升市追沽，特別係當指數逼近 21000時更十分進取，單係周一便有 1.2億錢坐熊證。短炒走位要快，當心市況速回後再被挾上去。今年世事反常，美國都可以賽和英格蘭，當人人認為美國中期選舉前股市會被砌低，就應該保持反向思維嘅警覺性，或會有意外驚喜。大家有冇留意，通常美國新任總統首兩年任期，經濟都會經歷調整期，股市跌至谷底。其後政府施政到位，為連任鋪路都會推出刺激經濟措施以顯政績。政策效果一般在任期最後兩年浮現，股市及經濟隨之轉好。若果連任又點？歷史上包括列根、克林頓同小布殊喺連任後嗰屆，都好大喜功冇畀經濟休養生息。結果列根第二屆任期內嘅第 3年，發生 87股災；克林頓命運一樣， 2000年科網泡沫爆破，亦係佢任期最後一年；而小布殊則喺佢在任最後一年，為金融海嘯埋下炸彈。聽落事有湊巧，但政治冇嘢係唔可能，總統為咗連任有乜做唔出！奧巴馬 09年上任後，股市去年 3月見底，按總統周期理論，股市嘅底應喺 2010年前出現，到底去年 3月嗰個係底，定係有機會出現雙底衰退？明天再談。
.
.
.
2010年06月24日 Appledaily.com 胡孟青


青心直說： G20峯會美國又是大贏家2010年06月24日

昨日提到奧巴馬任期 2012年初才完結，今日探討一下，按總統周期經濟論，去年 3月美股底部是否反映最壞情況已過去? 再度探底的可能性是否存在?

以現時的市況，相信絕大部份人甚至大行都認為，港股再回落至 08年 10月 10,676 的低位根本沒可能。當時中港股市先探底（因為阿爺家底厚），美股要到 09年 3月 6日低見 6,469 後始反彈。今次當我們還為重上 250日線開香檳，美股早已用 4個交易日便完成深度調整。

金融海嘯後，全球市場已變成 A股式政策市，在各國政府人為救市下，唔會再有大型銀行倒閉，歐洲亦唔會有國家破產，因此再出現大恐慌令股市探底可能性較低。相反，擔心的是到底全球是否正面臨雙底衰退，隨時有如溫水煮蛙被陰乾。

從經濟情況睇，美國 5月就業復蘇情況未如預期理想，零售銷售又出乎預期跌 1.2%。隨着房屋退稅優惠於 4月終結，新申請按揭及新屋動工同樣減少，上月二手房屋銷售甚至出乎意料下跌 2.2%，反映刺激經濟措施已無以為繼。

逼人仔升值　變相削債
歐洲同樣面對財赤問題，問題在於各國緊縮開支避免歐元危機下，變相啟動退市機制，對經濟帶來打擊。

英國公佈二次大戰以來最辣的緊縮預算案，希望透過加銷售稅及資本增值稅等，令財赤由目前佔 GDP的 10.1%，於 5年內降至 1.1%。

此外，英、德、法 3國將聯手向銀行徵稅，對企業營商環境及民生肯定是一大打擊。

新末日博士克魯明 5月才說經濟脫離危險期，最近改口風，撰文指全球雙底衰退在即，認為歐洲減赤將導致利率下降，歐元進一步貶值，最終牽動全球緊縮。為今之計是美國人盡量消費，才有望避過一劫。

奧巴馬信晒佢，打算充當推銷員，於 G20峯會上呼籲各國停止削減開支，大力消費。美國推廣不負責任式過度消費，因當地 GDP有 70%來自內需，所以每當公佈零售銷售及消費者情緒數據，對市況影響至大。

美國咁有信心可以獨沽一味靠消費拯救全世界走出雙底衰退，其實早有預謀，先借評級機構及金融大鱷之力，將希臘問題提升至國際危機等級，順便將歐元拉落嚟，債務就自動減一截。如今又想逼人民幣升值再慳多一筆，因中國係美國最大債權國，手持超過 9,000億美元國債。債仔惡過債主，全球被迫上梁山，睇怕 G20各國都要被動撐美式方案。
.