東岳集團 (189) 胡溫高度評價, 製冷劑市佔全球三成

胡溫高度評價東岳
國際金融集團（IFC）有份入股嘅中資上市公司，近期表現都大放異彩，證明IFC識於微時嘅投資，到今日已獲豐厚回報，而市場則對同獲IFC以原始股形式入股嘅東岳集團（0189）明顯大大忽略。集團旗下製冷劑業務不僅坐擁全球三成市佔率，連胡錦濤主席及溫家寶總理都先後視察其廠房後對其離子膜業前景作高度重視。以現時預測市盈率只為8.5倍嘅市價衡量，實在係一件超級國寶，中線目標可定在3.4元水平。

製冷劑市佔全球三成
東岳係內地最大製冷劑生產商，製冷劑有兩大用途，其一用在家居及商用空調，其次則用於汽車空調，集團內地市佔率高達六成，全球市佔率則達三成，旗下個個都係大客，包括內地格力、海爾及美的集團，另LG及三菱等海外著名生產商亦係其大客。

現時集團更正與日本新日鐵及三菱合作，發展全球最大嘅清潔發展機制（CDM）業務。

東岳之所以被國家高度重視，係因為其全力投產嘅離子膜新材料，過去只有美國杜邦及日本旭化等極少數國際大集團能夠製造。但隨着東岳離子膜正式投產，中國已成全球第三個掌握相關技術嘅大國。離子膜係燃料電池核心材料，亦勢成未來新能源產品嘅重要材料支柱，東岳今後生意肯定無憂。唔怪得溫總在舊年6月底、及胡主席在10月份視察東岳廠房後，都對呢家集團作出重要講話，可見國家對其實在高度重視，係市場中極度罕見也。

東岳舊年上半年溢利6,326萬元（人民幣.下同），管理層表示7月後產品供不應求，售價隨之上漲，市場預期2009全年盈利可達1.7億元，今年2010則可大增至3億元，折合每股0.15元。

再睇其他數據，集團於2007年底以每股2.16港元上市，而上市前已獲IFC以原始股方式成為股東，比起其他如玖源（0827）及浙江玻璃（0739）等於上市後先至入股嘅個案唔同，所以栽培誠意更深更厚，而玖源同浙玻股價已較IFC入股成本高出逾倍，按理東岳股價亦應以2.16港元上市價再加一倍溢價先算合理也。

現價可作長線投資
又以家電股保守市盈率已達20倍過外計算，東岳以同一估值量度嘅目標應為3.4港元，折合市帳率亦不足3倍，亦都係只較上市價高出57%而已，所以現價1.46元真係好抵買入作長線。

信曉飛 20.1.2010
http://www.hkdailynews.com.hk/finance.php?id=82218
.
.