青心直說：工業股中的大笨象

青心直說：工業股中的大笨象

Appledaily.com 14.1.2010

大市受累收緊銀根消息，繼續向下游，但資金相反走，往上游搵投資機會；尤其係上游設備供應商，理得下游有冇議價能力，總之有阿爺撐嘅大國企一定有錢找數走唔甩。日前提及中興通訊（ 763）上游嘅摩比發展（ 947）、智能電網上游嘅中國高精密（ 591），同運油氣唔少得嘅勝利管道（ 1080），全部逆市變資金避難所，大戶認為下游股份炒味太濃、估值過高自然往高處走。乜嘢經濟數據都係假，各國政府要砌靚盤數冇難度，返璞歸真，工業股先係最能反映實體經濟復蘇嘅最佳指標。

從宏觀大形勢出發，德昌電機（ 179）股價剛重回金融海嘯前水平，多年來一浪低於一浪的形態似有轉勢迹象，記得 08年 8月仲企 3元樓上，跌到 1蚊邊至識彈，現時雖然自低位翻近 3倍，仍嚴重落後大市，再翻多幾番冇難度。

德昌業績改善等翻身
呢啲令人哀莫大於心死且再無人關心嘅股票，至有機會置諸死地而後生，尤其係管理層仍然進取，難怪大股東單係今個月內已 4度增持，而且越買越貴，現時持股量近 60%，有理由相信下次業績將大幅改善。單係睇番最新公佈嘅半年業績，收入按年升 16%，毛利 26.6%，現金流量高達 1.45億美元，每股盈利 0.4美元，現價唔夠 10倍 PE。最壞情況，現金水平仍有 4.12億美元，淨負債對股本 12%，淨資產 11億美元，每股 NAV約 3.8元（重申 NAV只係參考指標之一，唔代表抵買）。單係現金，每股值 0.87元。

德昌業務明顯有改善，銷售額過半來自汽車產品，大客仔包括寶馬，而工業用產品佔收入僅 34%，所以話佢係汽車股上游絕唔過份。從業務分佈角度看，德昌係工業股中的滙豐控股（ 005），佢嘅汽車配件市場三分天下，美國佔 20%、亞洲 25%、歐洲 53%，仲成功打入內地汽車市場。股票嘅嘢好講時機，只要一息尚存，總有翻身一日！

胡孟青
.
.
.