青心直說：落注煤股要識揀

青心直說：落注煤股要識揀

Appledaily.com 2010年01月18日

上周講過新股南戈壁（ 1878）有中投同淡馬錫等撐腰，加上係加拿大以外地區第二上市，所以定價會較資產淨值高啲。隨着南戈壁高調招股上市，炒影子股手影開始慢慢浮面。先唔講幾隻煤股走勢，最新加入呢個「蒙古黑炭頭俱樂部」仲有中國秦發（ 866），去年尾突然宣佈透過全資附屬公司，收購鄂爾多斯市巴音孟克納源煤炭 60%股權，總代價 8.57億元人民幣。仲話礦場近 30平方公里，獲授權採礦的煤炭儲量約 1.59億噸，預計年產至少 90萬噸。咁儲量咪仲多過南戈壁嘅 1.4億噸。點都好，煤炭熱已成為新炒作板塊，而充滿神秘色彩嘅蒙古資源，相信會陸續被「翻叮」大炒。不過炒時炒，大家唔好以為只得蒙古有礦產資源，其實單係中國境內，煤產量已喺世界名列前茅。最新數據顯示，內蒙去年煤炭產量 6.37億噸，已超越山西，成為中國最大產煤省分。內蒙人應該幾有錢，因為佢連續 7年高踞全國 GDP增速第一，北京 80%電力來源都係內蒙，今年全省原煤計劃產量 7.3億噸，增 16%，拍得住當地 GDP。

內蒙有礦更實際
相比內蒙，蒙古面積雖大，但已知嘅煤蘊藏量較少，據官方數字約 500億至 1520億噸，但勝在開採得少，目前只係掘咗約 500萬噸，亦係呢個原因吸引咁多外資入去掘金。蒙古最多係黃金同銅，已知金礦有 300幾個，儲量 3400噸、銅量 40億噸，分別排亞洲第一、二位。不過，即使量大亦有運輸困難，交通鐵路網未掂，之所以點解喺蒙西有礦嘅蒙古能源（ 276）遲遲未有煤運出。蒙古熱係概念、係憧憬，而唔係可以快速帶動公司盈利增長嘅引擎。

反而實實在在，喺內蒙嘅全中國最大神府東勝煤礦就非常成熟，自 07年已成為國家首個億噸級煤炭基地，產量連續 10年創新高， 08年有 1.27億噸，係中國神華（ 1088）未來盈利增長最大動力，加上神華有齊鐵路運輸等配套，運出運入冇難度。

另一方面，短線睇煤價升，最能捕捉係具價格彈性嘅兗州煤業（ 1171）；中煤能源（ 1898）就貨源歸邊，基金同大股東揸近 84%。

Appledaily.com 18.1.2010 胡孟青

.
.