瑞聲聲學 (2018) 毛利率 44.9%, 極考持貨者耐性,成交疏落

青心直說：三網融合商機上游尋

大市進入整固期，資金充裕鑊氣夠，噚日輪到玩三網融合嘅「是是但但」炒作概念，朝早冇 100%升幅都吸引唔到散戶眼球。投資商機除咗內容供應商，最直接就係男人至愛嘅 Gadgets，亦即係女人認為唔多等使嘅電腦、智能手機甚至 LED電視等男人玩具。蘋果公佈 6月推 Muti-task嘅 iPhone，即 iPhone HD，而全球最大智能手機生產商 Nokia更準備今年秋季出平板電腦，到時連埋 Google都加入戰團，三國鼎立定必有連場惡鬥。三網融合咁抽象，不妨順住呢個概念一層一層往上游尋找綠洲，最直接係搵出呢啲科技玩具嘅零件生產商，例如屏幕、鍵盤、天線等，但呢啲零件都唔算係好投資，除咗競爭大，毛利往往被成本上升壓榨。

瑞聲食正潮流有錢途
原來手機入面，最賺錢係高科技喇叭同鏡頭。瑞聲聲學（ 2018）嘅手機聲學產品市場份額超過 25%， Nokia、 Sony Ericsson、 Samsung、 HTC都係佢嘅客，去年營業額 22億元（人民幣．下同），賺 6.15億元，創晒新高，毛利率增至 44.9%。根據 IDC數字，去年第四季全球手機市場增長 11.3%，連升 5季，付運量 3.2億部，全年 11.3億部，預期未來幾年智能手機年均增長達 30%。今年全球手機付運量閒閒哋超過 13億部，即係話有過 3億幾部手機要用瑞聲嘅喇叭。

公司手頭現金達 17.35億元，負債只有 1.87億元，即使須為拓展業務而擴大產能，亦應冇集資壓力，唯一須注意係股份成交疏落，往績市盈率 25倍對科技股算平，對工業股就算貴，但大家有幾何見過純工業股毛利率會咁高？不過此股極考持貨者耐性。

保守估計，今年定單起碼增三成，大股東同基金一早上定車，持貨已超過 88%。家陣唔少電子書、數碼錄影機甚至相機都會加裝收音器及喇叭，仲有公司同 Samsung合作生產 LED電視超薄喇叭，預期將成為未來一大增長引擎。

Appledaily.com 胡孟青 15.4.2010
.